රවින්ද්‍රාගෙන් අභියෝගාත්මක පිතිහරඹයක්

ශ්‍රී ලංකාව හා සංචාරක නවසීලන්ත කණ්ඩායම අතර ගාල්ලේ දී පැවැත්වෙන පළමු ටෙස්ට් ක්‍රිකට් තරගයේ සිව්වැනි දිනය වන ඊයේ (22) පස්වරුවේ තරගය නතරකරන විට සිය දෙවැනි ඉනිම ක්‍රීඩාකරමින් සිටි නවසීලන්ත කණ්ඩායම කඩුලු 08ක් බිඳවැටී ලකුණු 207ක් රැස්කරගෙන සිටියේය.

ඒ අනුව ලකුණු 275ක ඉලක්කයක් හඹා යමින් සිටින ඔවුන් අද (23) දිනයේ දී තවත් ලකුණු 68ක් රැස්කරගත යුතු අතර ඒ වෙනුවෙන් ඔවුන්ට තවත් ඉතිරිව ඇත්තේ කඩුලු 02ක් පමණි.

ශ්‍රී ලංකාවට ප්‍රබල අභියෝගයක් එල්ල කරමින් සිටින රචින් රවින්ද්‍රා ලකුණු 91ක් රැස්කරගෙන සිටින අතර ඔහු සමගින් 09වැනි කඩුල්ලට ලකුණු 04ක සබඳතාවක් පවත්වාගෙන සිටින අජාස් පටෙල් මේ දක්වා ලකුණු රැස්කර නොමැත.

ශ්‍රී ලංකාව වෙනුවෙන් දක්ෂ පන්දු යැවීමක නිරත වූ රමේෂ් මෙන්ඩිස් (3/83) හා ප්‍රභාත් ජයසූරිය (3/66) කඩුලු 03 බැගින් දවා ගැනීමට සමත් වූහ.

සිව්වැනි දිනයට ඊයේ (22) උදෑසන තරගය ආරම්භ කරන විට සිය දෙවැනි ඉනිම ක්‍රීඩාකරමින් සිටි ශ්‍රී ලංකා කණ්ඩායම කඩුලු 04ක් දැවී ලකුණු 237ක් රැස්කරගෙන සිටියේය.

කෙසේ නමුත් ශ්‍රී ලංකා දෙවැනි ඉනිම ලකුණු 309කට සීමාකිරීමට දක්ෂ නවසීලන්ත පන්දු යවන්නෝ කටයුතු කළහ.