පාපන්දු ඉතිහාසයේ බිහිවූ විශිෂ්ටතම ක්‍රීඩකයෙකු වන ක්‍රිස්ටියානෝ රොනාල්ඩෝගේ ලෝක කුසලාන සිහිනය සදහටම නිමාවට පත්ව තිබෙනවා. ඒ, ස්පාඤ්ඤය සමඟ පැවැති තීරණාත්මක තරඟයෙන් පෘතුගාලය ගෝල 1-0ක් ලෙස පරාජය වීමත් සමඟයි.

Dallas හි පැවැති මෙම තරඟයේ අතිරේක කාලයේදී ස්පාඤ්ඤයේ Mikel Merino වාර්තා කළ සුපිරි ගෝලයත් සමඟ පෘතුගාලය තරඟාවලියෙන් ඉවතට විසි වූ අතර, රොනාල්ඩෝ දැඩි සේ සංවේදී වෙමින් කඳුළු සලන අයුරු ක්‍රීඩා ලෝලීන්ට දැකගත හැකි වුණා.

වාර්තා රැසක හිමිකරුවාට අහිමි වූ එකම කුසලානය

41 වැනි වියේ පසුවන Ronaldo, ලෝක කුසලාන තරඟාවලි 6කදී ගෝල වාර්තා කළ ලොව එකම ක්‍රීඩකයායි. පෘතුගාලය සහ ඔහු ක්‍රීඩා කළ විවිධ සමාජ මට්ටමේ කණ්ඩායම් වෙනුවෙන් සමස්ත ගෝල 976ක් ලබා ගනිමින් ලෝක වාර්තාවකට ද ඔහු හිමිකම් කියනවා. Ballon d’Or සම්මාන 5ක්, Champions League කුසලාන 5ක් සහ Euro 2016 කුසලානය දිනා ඇති රොනාල්ඩෝට සිය ක්‍රීඩා ජීවිතයේදී ජයග්‍රහණය කිරීමට නොහැකි වූ එකම ලොකුම අභියෝගය වූයේ ලෝක කුසලානයයි. 2006 වසරේදී පෘතුගාලය සමඟ අවසන් පූර්ව වටයට පිවිසීම ඔහු ලෝක කුසලානයක ලැබූ උපරිම දක්ෂතාව වෙනවා.

මෙය තමාගේ අවසාන ලෝක කුසලානය වන බව ඔහු මීට පෙරද නිල වශයෙන් ප්‍රකාශ කර තිබුණා. කෙසේ වෙතත්, ඉදිරියටත් ජාතික කණ්ඩායම වෙනුවෙන් ක්‍රීඩා කරන්නේදැයි තරඟයෙන් පසු මාධ්‍යවේදීන් ඇසූ ප්‍රශ්නයකට පිළිතුරු දෙමින් ඔහු පැවසුවේ, “මම මුලින්ම මගේ පවුලේ අය මුණගැහිලා, ඉතාමත් සන්සුන් මනසකින් යුතුව ඉදිරි තීරණ ගන්නවා” යනුවෙන්.

“ඔහු ක්‍රීඩා පිටියේ සීයා කෙනෙක් වගේ ඇවිදිනවා” – විවේචන රැල්ලක්!

Al-Nassr කණ්ඩායමට ක්‍රීඩා කරන රොනාල්ඩෝව සෑම තරඟයකදීම ආරම්භක සංචිතයට ඇතුළත් කිරීමට සිදුවීම පෘතුගාල කණ්ඩායමේ පසුබෑමට හේතුවක් වූවාද යන්න පිළිබඳව මේ වන විට දැඩි කතාබහක් නිර්මාණය වී තිබෙනවා.

BBC ක්‍රීඩා විචාරකයෙකු මෙන්ම හිටපු එංගලන්ත ඉදිරිපෙළ ක්‍රීඩකයෙකු වන Chris Sutton මේ පිළිබඳව දැඩි විවේචනයක් එල්ල කළා.

“ඔහු ක්‍රීඩා පිටියේ සීයා කෙනෙක් වගේ එහාට මෙහාට ඇවිදිනවා. පෘතුගාලය පැරදුණේ ඒ නිසයි. ක්‍රිස්ටියානෝ රොනාල්ඩෝ පිටියේ කිසිවක් කළේ නැහැ. පෘතුගාල කණ්ඩායමේ පුහුණුකරු Roberto Martinez මොනවා කරනවාද මන්දා? එක ක්‍රීඩකයෙක් වෙනුවෙන් මුළු කණ්ඩායමම මෙච්චර යටත් කරන්නේ කොහොමද? පෘතුගාලය තරඟයෙන් ඉවත් වුණේ Roberto Martinez නිසයි.”

පුහුණුකරු තනතුරෙන් ඉල්ලා අස්වෙයි

තරඟයේ පරාජයෙන් පසු පෘතුගාල කණ්ඩායමේ ප්‍රධාන පුහුණුකරු Roberto Martinez සිය ධුරයෙන් ඉල්ලා අස්වන බව නිවේදනය කළා. කෙසේ වෙතත්, ඔහු රොනාල්ඩෝව හඳුන්වා දුන්නේ “පාපන්දු ක්‍රීඩාවේ සැබෑ සලකුණක්” ලෙසයි.

“මේ ලෝක කුසලානයේදී ඔහු අප වෙනුවෙන් කරන්න උත්සාහ කරපු හැමදේටම අපි ඔහුට ස්තූතිවන්ත වෙන්න ඕනේ. ලෝක කුසලානය දිනන එක ඔහුගේ ලොකුම හීනයක්ව තිබුණා. ඔහු පාපන්දු ක්‍රීඩාවට වගේම ඒ ක්‍රීඩකයා පිටුපස ඉන්න මිනිසාටත් කදිම ආදර්ශයක්” යැයි Martinez වැඩිදුරටත් පවසා සිටියා.

Image credit: talksport.com