ඕස්ට්‍රේලියාවේ රජය විසින් අලුතින් ගෙන ඒමට සූදානම් වන “Digital Duty of Care” නම් අන්තර්ජාල ආරක්ෂණ පනත (Internet safety bill) සම්බන්ධයෙන් මේ දිනවල දැඩි කතාබහක් ඇතිවී තිබෙනවා. මේ නීතිය මගින් අන්තර්ජාල සමාගම් වලට සිදුවෙනවා තමන්ගේ platforms වල තිබෙන පරිශීලකයින්ට හානිකර දේවල් (harmful content) ගැන සොයා බලා ඒවා ඉවත් කරන්න. එසේ නිසි පියවර නොගත්තොත් එම සමාගම් වලට ඕස්ට්‍රේලියානු ඩොලර් මිලියන 109ක් දක්වා (A$109 million) දඩ මුදලක් ගෙවන්නට සිදු වෙනවා.

කෙසේ වෙතත් Google, Meta (Facebook, WhatsApp, Instagram), TikTok සහ Snap වැනි දැවැන්ත tech සමාගම් මෙම නීතිය ගැන දැඩි කනස්සල්ල පළ කර තිබෙනවා. ඔවුන් පවසන්නේ දඩුවම් වලින් බේරීමට සමාගම් විසින් විශාල වශයෙන් posts සහ content censor කරන්නට පෙළඹෙනු ඇති බවයි. මෙය නිදහස් අදහස් ප්‍රකාශ කිරීමට (free speech) බාධාවක් වනු ඇති බව ඔවුන්ගේ මතයයි. උදාහරණයක් විදිහට, ළමයින්ට porn වැනි දේවල් දර්ශනය වීම වැළැක්වීමේ වයස් සීමා නීති (age checks) නිසා, වයස අවුරුදු 18ට අඩු අයට Gmail භාවිත කිරීම පවා නවත්වන්නට සිදුවිය හැකි බවට Google සමාගම විසින් අනතුරු අඟවා තිබෙනවා.

නමුත් ඕස්ට්‍රේලියාවේ eSafety Commissioner වන Julie Inman Grant මෙම චෝදනා සම්පූර්ණයෙන්ම ප්‍රතික්ෂේප කරනවා. ඇය පෙන්වා දෙන්නේ සමාගම් හැමවිටම උත්සාහ කරන්නේ යම් දෙයකින් සමාජයට කොතරම් හානියක් වුනත්, පරිශීලකයින්ගේ අවධානය (user engagement) වැඩි කරගැනීම සඳහා උපරිමයෙන් content පෙන්වීමට බවයි. අන්තර්ජාලයේ යම් over-censoring එකක් (ඕනෑවට වඩා දේවල් ඉවත් කිරීමක්) සිදුවෙනවා නම්, එයට හේතුව මේ tech සමාගම් වල තිබෙන automated moderation systems (AI) මිසක් රජයේ නීති වල බලපෑමක් නොවන බවද ඇය වැඩිදුරටත් පෙන්වා දෙනවා.

මේ වනවිට මෙම පනත House of Representatives (නියෝජිත මන්ත්‍රී මණ්ඩලය) හරහා සම්මත වී ඇති අතර, සම්පූර්ණ නීතියක් බවට පත්වෙන්නට නම් Senate එකේ සහයෝගය ද අවශ්‍ය වෙනවා. ඕස්ට්‍රේලියානු රජය උත්සාහ කරන්නේ මේ වසර අවසන් වීමට පෙර මෙම පනත සම්මත කරගැනීමටයි. විශේෂයෙන්ම මේ නීතිය හරහා users ලට තමන්ගේ සමාජ මාධ්‍ය ගිණුම් වල algorithms මගින් පෙන්වන දේවල් නැවැත්වීමටත් (opt-out), තමන් follow කරන අයගේ දේවල් පමණක් බැලීමටත් (feed choice) හැකියාව ලැබෙන බවද සඳහන් වෙනවා.