දිට්වා සුළි කුණාටුව නිසා ආපදාවන්ට පත් ජනතාව වෙනුවෙන් සහාය වීම සඳහා ඕස්ට්රේලියානු රජය විසින් ඕස්ට්රේලියානු ඩොලර් මිලියන 1 ක මානුෂීය ආධාර ලබා දෙන බව ඕස්ට්රේලියානු මහ කොමසාරිස් කාර්යාලය 2025 නොවැම්බර් 30 වන දින (ඊයේ) නිවේදනය කළා.
ශ්රී ලංකාව පුරා ගංවතුර සහ නායයෑම් නිසා නිවාස හා යටිතල පහසුකම් වලට හානි වීමෙන් පීඩාවට පත් ප්රජාවන්ට අත්යවශ්ය සේවා ඉක්මනින් සැපයීමට සහාය වීම මෙම අරමුදල්වල අරමුණ වෙනවා. ඕස්ට්රේලියාව මානුෂීය හවුල්කරුවන්, එක්සත් ජාතීන්ගේ සංවිධානය සහ local NGO සමඟ සහයෝගයෙන් කටයුතු කරමින් ආධාර ලබා දීමට වගේම හදිසි අවශ්යතා සඳහා ඉක්මනින් ප්රතිචාර දැක්වීමටත් ඔවුන් සූදානමින් සිටිනවා.
ඕස්ට්රේලියානු ඩොලර් මිලියන 1 ක දායකත්වයට අමතරව, බලපෑමට ලක් වූ ප්රදේශවල ක්ෂණික අවශ්යතා සපුරාලීම සඳහා පවතින අරමුදල් යැවීමට ඕස්ට්රේලියාව දේශීය සිවිල් සමාජ හවුල්කරුවන් සමඟ කටයුතු කරන අතර, කාන්තාවන්, ගැහැණු ළමයින් සහ ආබාධ සහිත පුද්ගලයින් ඇතුළු කණ්ඩායම්වලට ප්රමුඛතාවය ලබා දෙනවා.
අර්බුදයෙන් පීඩාවට පත් කාන්තාවන් සහ ගැහැණු ළමයින්ගේ ලිංගික හා ප්රජනන සෞඛ්ය සහ ආරක්ෂණ අවශ්යතා සඳහා සහාය ලබා දීමට UNFPA සහ ඕස්ට්රේලියාව විසින් කළමනාකරණය කරනු ලබන Regional Prepositioning Initiative ඇතුළුව කලාපීය ප්රතිචාර අරමුදල් සක්රීය කිරීම ද ආධාරයට ඇතුළත් වෙනවා.
ශ්රී ලාංකිකයන් මිලියන 1 ක් පමණ සුළි කුණාටුවෙන් පීඩාවට පත්ව ඇති අතර, බලධාරීන් තක්සේරු කිරීම් දිගටම කරගෙන යන විට එම සංඛ්යාව ඉහළ යනු ඇතැයි අපේක්ෂා කෙරෙනවා.
“මෙම විනාශකාරී අවස්ථාවේදී ඕස්ට්රේලියාව ශ්රී ලංකාව සමඟ සිටිනවා. රට පුරා සිටින ප්රජාවන්ගේ හදිසි අවශ්යතා සපුරාලීම සඳහා අපි රජය, මානුෂීය ක්රියාකාරීන් සහ සිවිල් සමාජය සමඟ සමීපව කටයුතු කරනවා. අපි ශ්රී ලංකාවේ ජනතාව සමඟ, විශේෂයෙන් පවතින අර්බුදයෙන් පීඩාවට පත් වූවන් සමඟ සිටිනවා” යනුවෙන් ශ්රී ලංකාවේ ඕස්ට්රේලියානු මහ කොමසාරිස් Matthew Duckworth පැවසුවා.
