ශ්‍රී ලංකා මහ බැංකුවේ මුදල් ප්‍රතිපත්ති මණ්ඩලය විසින් මුදල් ප්‍රතිපත්තිය තවදුරටත් ලිහිල් කිරීමට තීරණය කර ඇති අතර, ඒ අනුව එක්දින ප්‍රතිපත්ති අනුපාතිකය පදනම් අංක 25කින් අඩු කර 7.75%ක් ලෙස නියම කර තිබේ.
දේශීය සහ ගෝලීය ආර්ථික ප්‍රවණතා පිළිබඳ සවිස්තරාත්මක විශ්ලේෂණයක් පදනම් කරගෙන මෙම තීරණය ගෙන ඇති බව මහ බැංකුව සඳහන් කරයි.
මැදි කාලීනව උද්ධමනය 5%ක පමණ ඉලක්ක මට්ටමට ස්ථායීව ළඟා වීමක් සහතික කරගැනීම සහ ජාතික ආර්ථිකය සිය උපරිම ධාරිතාව මට්ටම වෙත යාමට අවශ්‍ය සහාය සැලසීම මෙම තීරණයේ ප්‍රධාන අරමුණ බව ශ්‍රී ලංකා මහ බැංකුව පවසයි.
