කලින් articles වලින් ඕස්ට්‍රේලියාවේ උසස් අධ්‍යාපනය හදාරන්න හිතන් ඉන්න ඔයාට Canberra නගරය ප්‍රධාන Australian Capital Territory එක ගැන සහ Sydney නගරය ප්‍රධාන New South Wales ගැන කිව්වා. අද අපි කියන්න හදන්නේ ඕස්ට්‍රේලියාවේ උසස් අධ්‍යාපනයට සූදානම් වන ඔයා Northern Territory එක සහ එහි ප්‍රධාන නගරය වන Darwin ගැන වගේම එහි අධ්‍යාපනික පරිසරය ගැන දැනගන්න අවශ්‍ය දේවල්. මේ දේවල් උසස් අධ්‍යාපනයට හරියනම තැනක් තෝරාගන්න ඔයාට උදව් වෙයි.

ගුණාත්මක අධ්‍යාපනයක්, සුන්දර වටපිටාවක් සහ දැරිය හැකි ජීවන රටාවක් සමග අධ්‍යාපනය ලබන්න හොඳම උසස් අධ්‍යාපනික අවස්ථා ඔබට මෙම ප්‍රදේශයෙන් සොයා ගන්න පුළුවන්. ඕස්ට්‍රේලියාවේ ලෝක ප්‍රසිද්ධ ස්වාභාවික ස්ථාන දෙකක් වන Uluru සහ Kakadu ජාතික වනෝද්‍යාන පිහිටා ඇත්තේද මේ උතුරු ප්‍රදේශයේයි.

දේශීය මෙන්ම ජාත්‍යන්තර සිසුන් සඳහා උසස් තත්ත්වයේ අධ්‍යාපනයක් සහ පුහුණු අත්දැකීම් ලබා දීමට කැපවී සිටින අධ්‍යාපන ආයතන රැසක් මෙහි පිහිටා තිබෙනවා. The Good Universities Guide 2023 ට අනුව, චාල්ස් ඩාවින් විශ්ව විද්‍යාලය (CDU) උපාධි අපේක්ෂක රැකියා නියුක්තිය අතින් ඕස්ට්‍රේලියාවේ සිව්වන විශ්ව විද්‍යාලය ලෙස ශ්‍රේණිගත කර තිබෙනවා. එක්සත් ජාතීන්ගේ තිරසාර සංවර්ධන ඉලක්ක සමඟ දැඩි ලෙස ඒකාබද්ධ වී ඇති ඔවුන්ගේ පර්යේෂණ ව්‍යාපෘති නිසාම චාල්ස් ඩාවින් විශ්ව විද්‍යාලයට (CDU) ජාත්‍යන්තරව ඉතා ඉහළ පිළිගැනීමක් ලැබෙනවා.

ප්‍රධාන කර්මාන්ත

Northern Territory ලොව විශාලතම ඛනිජ නිධි කිහිපයකට නිවහන වන අතර ඒ සම්බන්ධ කර්මාන්තවල විශාල දියුණුවක් අත්පත් කරගෙන සිටින ප්‍රදේශයක්.

මෙම ප්‍රදේශයේ ප්‍රධාන කර්මාන්ත:

• Mining (පතල් කැණීම්)
• Mining Equipment Technology and Services (පතල් උපකරණ තාක්ෂණය සහ සේවා)
• Renewable Energy (පුනර්ජනනීය බලශක්තිය)
• Oil and Gas (තෙල් හා ගෑස් )
• Agriculture, Forestry and Fishing (කෘෂිකර්මාන්තය, වන වගාව සහ මසුන් ඇල්ලීම)
• Construction (ඉදිකිරීම්)
• Tourism (සංචාරක ව්‍යාපාරය)
• International Education and Training (ජාත්‍යන්තර අධ්‍යාපනය සහ පුහුණුව)
• Tropical Health and Research (නිවර්තන සෞඛ්‍ය සහ පර්යේෂණ)

ඒ වගේම මනස්කාන්ත පරිසර පද්ධති විඳ ගැනීමට කැමති ඔබ මෙහි ආවොත්, ලෝකයේ වඩාත්ම දර්ශනීය ස්වාභාවික ජලාශ සහ දිය ඇලි කිහිපයක් ම දැක බලා ගැනීමට අවස්ථාව ලැබෙනවා. Ayers Rock ලෙසද හැඳින්වෙන Uluru, මීටර් 348 ක උසකින් යුත් ලොව විශාලතම වැලිගල් ඒකලිතය (sandstone monolith) වෙනවා. වසර 30,000 කට වැඩි කාලයක් එහි ජීවත් වූ දේශීය Anangu ජනයා එය ඉතා අධ්‍යාත්මික හා පූජනීය ස්ථානයක් ලෙස ද සලකනවා.

Kakadu ජාතික වනෝද්‍යානය ඕස්ට්‍රේලියාවේ විශාලතම ජාතික වනෝද්‍යානයයි. එහි සුන්දර දිය ඇලි, වැසි වනාන්තර, විදේශීය වනජීවීන් සහ පුරාණ පාෂාණ කලාව ඔබට වෙනස්ම අත්දැකීමක් වේවි. Alice Springs යනු කාන්තාර භූ දර්ශන සහ සුවිශේෂී ඉතිහාසයක් සහිත බොහෝ දෙනාගේ ප්‍රියතම සංචාරක ස්ථානයක්.

Darwin නගරය 

Northern Territory හි අගනුවර වන Darwin, වසර පුරා ආකර්ෂණීය සංස්කෘතික, සමාජීය සහ ආහාර උත්සව රාශියක් ඇති සජීවී නගරයක්. ඩාවින් නගරය ආසියාවට පිවිසෙන දොරටුව වන නිසා ම, අවන්හල්, වෙළඳපොළවල් ආදියෙහි තරමක ආසියානු ලක්ෂණ දකින්නත් පුළුවන්.

මෙහි 150,000 කට අධික ජනගහනයක් ජීවත් වෙන අතර මෙම ජන කොටස් විවිධ සංස්කෘතීන්ගෙන් යුත් බහු සංස්කෘතික සමාජයක් නිර්මාණය කරනවා. ඒ නිසාම ඩාවින් යනු ඕස්ට්‍රේලියාවේ වඩාත්ම බහු සංස්කෘතික නගරවලින් එකක් ලෙස සැලකෙනවා. ඔයා උසස් අධ්‍යාපනයට මෙහි අවොත්නම් නිදහස් කාලය තුළ කිරීමට බොහෝ දේ තිබේවි. මෙම නගරයේ ඉතාම මිත්‍රශීලී ප්‍රජාවක් ජීවත් වන අතර ඔබට පහසුවෙන් සමාජ, ප්‍රජා සහ ක්‍රීඩා සමාජවලටත් සම්බන්ධ වෙන්න පුළුවන්.

දේශීය හා ජාත්‍යන්තර සිසුන් සඳහා වන රැකියා සහ වෘත්තීය අවස්ථා රාශියක් ද ඔබට ලැබෙන අතර ව්‍යාපාර සහ අනෙකුත් ප්‍රජා කණ්ඩායම් සමඟ සම්බන්ධ වෙලා ඉදිරි වෘත්තීය වගේම පුද්ගලික ජීවිතයටත් වැදගත් වෙන අත්දැකීම් රැසක් ලබාගන්න හැකියාව තියනවා. අධ්‍යයන කාලය තුළ අවශ්‍ය internships වගේම එතනින් එහාට නිවැරදි visa එකක් ලබාගෙන අදාළ ක්ෂේත්‍රය තුළ දිගටම රැදී ඉන්නත් ඔයාට පුළුවන්.

ඉතින් ඕස්ට්‍රේලියාවේ උසස් අධ්‍යාපනය හදාරන්න බලාපොරොත්තු වෙන මෙරට සිටින වගේම මෙරටට පැමිණෙන්න බලාපොරොත්තුවෙන් ඉන්න ඕනෑම කෙනෙක්ට උසස් අධ්‍යාපන සහ රැකියා අවස්ථා සහිත ඉතා හොඳ තෝරාගැනීමක් තමයි Darwin ප්‍රධාන Northern Territory ප්‍රදේශය.