Bondi වෙරළේ වෙඩි තැබීමෙන් පසු තුවක්කු හිමිකාරිත්වය පිළිබඳ නීතිමය හිඩැසක් වැසීමට NSW රජය පියවර ගනිමින් සිටින අතර, සිඩ්නි තදාසන්න ප්‍රදේශවල වැඩිම තුවක්කු හිමිකරුවන් සංඛ්‍යාවක් සිටින බව පොලිස් සංඛ්‍යාලේඛන හෙළි කර තිබෙනවා.

Camden හි පමණක් හිමිකරුවන් 2621 දෙනෙකු සතුව නීත්‍යානුකූලව හිමි තුවක්කු 9956 ක් ඇති අතර, සෑම බලපත්‍රලාභියෙකුම සාමාන්‍යයෙන් තුවක්කු 3.7 ක් තබා ගෙන සිටිනවා.

ඕස්ට්‍රේලියාවේ “gun state” (තුවක්කු රාජ්‍යය) ලෙස NSW සැලකෙනවා. මෙහි ලියාපදිංචි ගිනි අවි මිලියන 1.1 කට වඩා ඇති අතර එය රටේ වෙනත් ඕනෑම ප්‍රාන්තයක මුළු එකතුවට වඩා බොහෝ සෙයින් වැඩි අගයක්.

ඉරිදා Bondi සංහාරයේදී මියගිය බව කියන තුවක්කුකරුවෙකු වන සජිඩ් අක්‍රම්, නීත්‍යානුකූලව ඔහුගේ නමට තුවක්කු 6ක් ලියාපදිංචි කර ඇති අතර ඔහු 2025 ජූලි වන විට NSW හි ලියාපදිංචි තුවක්කු හිමිකරුවන් 254,992 ගෙන් එක් අයෙක්.

තත්වය තවත් නරක අතට හරවන කරුණ වන්නේ සිඩ්නි හි ඇතැම් ගිනි අවි හිමිකරුවන් හා සසඳන විට මෙම ත්‍රස්තවාදියාගේ තුවක්කු සංඛ්‍යාව අඩු අගයක් වීමයි.

2025 ජූලි මාසයේදී වාර්තාවලට අනුව, බටහිර උපනගරයක් වන Punchbowl හි එක් පුද්ගලයෙකු සතුව ගිනි අවි 226 ක් තිබූ අතර, සිඩ්නි හි නැගෙනහිර Chifley-La Perouse කලාපයේ තවත් අයෙකු සතුව 295 ක් තිබුණා.

Camden වලින් පසු, සිඩ්නි හි වැඩිම තුවක්කු හිමිකරුවන් සංඛ්‍යාවක් සිටින තදාසන්න ප්‍රදේශ අතරට සිඩ්නි හි වයඹ දෙසින් Windsor (2232), නිරිත දෙසින් Liverpool (2010), Wentworthville (1248) සහ Maroubra (1123) ඇතුළත් වෙනවා.

අර්බුදයට ප්‍රතිචාර වශයෙන්, NSW අගමැති Chris Minns නත්තලට පෙර තුවක්කු ප්‍රතිසංස්කරණ සම්මත කර ගත හැකි බව සහතික කිරීම සඳහා ලබන සතියේ පාර්ලිමේන්තුව හදිසියේ කැඳවා තිබෙනවා.

NSW පොලිසිය ප්‍රජාවට තර්ජනයක් යැයි සැක කරන හෝ බිය වන තුවක්කු හිමියන්ගේ බලපත්‍ර නිතිපතා අවලංගු කරන බව පැවසූ නමුත් අභියාචනා බොහෝ විට සාර්ථක විය හැකි බව පැවසුවා.

“අපි එම අභියාචනා මාර්ගය වසා දමමු” යනුවෙන් අගමැති පවසා තිබුණා.

ප්‍රාන්තයේ කලාපීය ප්‍රදේශවල, තුවක්කු හිමිකාරිත්වයේ සංඛ්‍යාව ඉහළ අගයක් ගන්නවා.

NSW හි මධ්‍යම Tablelands හි Bathurst වල ප්‍රාන්තයේ වැඩිම තුවක්කු හිමිකරුවන් සංඛ්‍යාවක් සිටින අතර, එම සංඛ්‍යාව 3683 ඉක්මවනවා. දෙවන ස්ථානයේ සිටින්නේ Goulburn වන අතර, එහි ගිනි අවි හිමිකරුවන් 3338ක් සිටිනවා.

ඕස්ට්‍රේලියානුවන් අත ඇති විශාල ගිනි අවි සංඛ්‍යාව හේතුවෙන් අගමැති ඇන්තනි ඇල්බනීස් ජාතික කැබිනට් මණ්ඩලය තුළ මෙම ගැටලුව මතු කර තිබෙනවා.

පුද්ගලයින්ට භාවිතා කළ හැකි හෝ බලපත්‍ර ලබා දිය හැකි තුවක්කු ගණන සීමා කිරීම ඇතුළුව දැඩි තුවක්කු නීති අවශ්‍ය බව අගමැතිවරයා පවසා තිබුණා.

දැඩි තුවක්කු නීති සාකච්ඡා කිරීම සඳහා ලබන සතියේ දෙසැම්බර් 22-23 දිනවල NSW පාර්ලිමේන්තුව නැවත රැස්වනු ඇත.