ශ්‍රී ලංකාවේ ප්‍රථම ‘ජල බැටරිය’ වන මහ ඔය පොම්ප කළ ජල ගබඩා විදුලි ව්‍යාපෘතිය ආරම්භ කිරීම සඳහා ශ්‍රී ලංකා විදුලි බල මණ්ඩලය පියවර ගෙන ඇති බව වාර්තා වේ.
මෙගාවොට් 600ක මුළු ස්ථාපිත ධාරිතාවයකින් යුත් මෙම ව්‍යාපෘතිය සූර්ය හා සුළං බලයෙන් ජනනය වන බලශක්තිය අතිරික්තයක් පවතින විට ඒවා ගබඩා කර ඉල්ලුම ඉහළ වන විට නැවත විදුලි බල පද්ධතියට සපයනු ලබයි.
මෙම ජල බැටරි ව්‍යාපෘතිය හරහා ශ්‍රී ලංකාවේ 2030 වන විට විදුලි උත්පාදනයෙන් 70%ක් පුනර්ජනනීය ප්‍රභවයන්ගෙන් උත්පාදනය කිරීමේ අරමුණ බවට පත්වන බව සඳහන් ය.
මෙම ව්‍යාපෘතිය අරණායක සහ නාවලපිටිය ප්‍රදේශවල පිහිටුවන ජලාශ දෙකක් කිලෝමීටර් 2.5ක උමං මාර්ගයකින් සම්බන්ධ කර ක්‍රියාත්මක වන මහා පරිමාණ බලශක්ති ගබඩා කිරීමේ පද්ධතියක් වන අතර එමගින් මෙරට පුර්ජනනීය බලශක්තිය කරා යන ගමනේදී පොසිල ඉන්ධන මත යැපීම අඩු කර වායු විමෝචනය සැලකිය යුතු ලෙස අවම කිරීමේ ඉලක්කය සපුරන බවද විදුලි බල මණ්ඩලය පවසයි. එමෙන්ම පාරිභෝගිකයින්ට දැරිය හැකි මිලක් සහතික කරමින් විදුලි ගාස්තු සඳහා වන බලපෑම් අවම කිරීම සඳහා ජාත්‍යන්තර ආයතනවලින් දිගුකාලීන අරමුදල් ලබා ගැනීම ද මෙම ව්‍යාපෘතියේ තවත් අරමුණක් බවට පත්වන බව සඳහන් ය.
එමෙන්ම මෙම ව්‍යාපෘතිය මගින් බලශක්ති ස්වාධීනත්වය, පුනර්ජනනීය බලශක්ති අවශෝෂණය කර ගැනීම සඳහා පද්ධති සහාය, ආර්ථික වර්ධනය, රැකියා උත්පාදනය සහ පාරිසරික තිරසරභාවය නියෝජනය වනු ඇති බවත් එම මණ්ඩලය නිකුත් කළ නිවේදනයේ සඳහන් ව තිබේ.
