ඔබ අන්තර්ජාලය හරහා මිලදී ගන්නා දේවල් සඳහා වෙනත් ඕනෑම ආනයනය කරන දේවල් වලට සමාන නීති, තීරුබදු සහ පිරික්සුම් ක්‍රියාවලීන් අදාළ වෙනවා. ඒ ගැන තමයි මේ කතාව.

AUD1000 හෝ ඊට අඩු වටිනාකමක් ඇති භාණ්ඩ සඳහා, සාමාන්‍යයෙන් දේශසීමාවේදී ගෙවිය යුතු තීරුබදු, බදු හෝ අනෙකුත් ගාස්තු අදාළ වෙන්නේ නැහැ. කෙසේ වෙතත්, 2018 ජූලි 1 වන දින සිට, ඕස්ට්‍රේලියාවේ පාරිභෝගිකයින් විසින් විදේශයන්ගෙන් භාණ්ඩ ආනයනය කරන විට, එවැනි අඩු වටිනාකමක් ඇති භාණ්ඩ සඳහා ද විදේශීය වෙළෙන්දන් විසින් භාණ්ඩ හා සේවා බද්ද (GST) අය කළ හැකියි. 

AUD1000 ට වැඩි වටිනාකමක් ඇති භාණ්ඩ සඳහා, ඔබට ආනයන ප්‍රකාශයක් පුරවා, දේශසීමාවේදී තීරුබදු, බදු සහ අදාළ ගාස්තු ගෙවීමට සිදු වනු ඇත. ඔබට දුම්කොළ හෝ මධ්‍යසාර වැනි සමහර භාණ්ඩ සඳහා ඒවායේ වටිනාකම නොසලකා තීරුබදු සහ බදු ගෙවීමට සිදු වේ. ඇතැම් භාණ්ඩ වර්ග ඕස්ට්‍රේලියාවට ගෙන ඒමට අවසර නැත. නැතහොත් විශේෂ බලපත්‍ර අවශ්‍ය වේ.

AUD1000 හෝ ඊට අඩු වටිනාකමක් ඇති භාණ්ඩ

භාණ්ඩවල වටිනාකම සහ ඒවා ඕස්ට්‍රේලියාවට පැමිණෙන ආකාරය අනුව, ඔබ වෙත බෙදා හැරීම සඳහා ඒවා නිෂ්කාශනය කරන ආකාරය සහ අදාළ විය හැකි තීරුබදු, බදු සහ අනෙකුත් ගාස්තු තීරණය වේ.

AUD1000 හෝ ඊට අඩු වටිනාකමක් ඇති භාණ්ඩ (දුම්කොළ, දුම්කොළ නිෂ්පාදන සහ මධ්‍යසාර පාන වර්ග හැර) “අඩු වටිනාකමක් ඇති ආනයන” ( low value imports) ලෙස හැඳින්වේ. 2018 ජූලි 1 වන දින සිට, ඕස්ට්‍රේලියාවේ පාරිභෝගිකයින් විසින් විදේශයන්ගෙන් ආනයනය කරන විට මෙම භාණ්ඩ සඳහා GST අදාළ විය හැකිය.

මෙම භාණ්ඩ ගුවන් හෝ මුහුදු භාණ්ඩ ප්‍රවාහන සේවා මගින් ඕස්ට්‍රේලියාවට පැමිණේ නම්, Self-Assessed Clearance (SAC) ප්‍රකාශයක් තිබිය යුතුය. මේ සඳහා කිසිදු ගාස්තුවක් අය නොකෙරේ. ඔවුන්ගේ සේවාවන් මීට සම්බන්ධ වන්නේ නම්, භාණ්ඩ සමාගම හෝ භාණ්ඩ ප්‍රවාහනය කරන්නා විසින් මෙම කටයුතු වල වගකීම දරනු ලැබේ. තැපෑලෙන්  පැමිණෙන භාණ්ඩ සඳහා SAC ප්‍රකාශයක් අවශ්‍ය නොවේ.

AUD1000 ට වැඩි වටිනාකමක් ඇති භාණ්ඩ

AUD1000 ට වැඩි වටිනාකමක් ඇති භාණ්ඩ ආනයනය කිරීමට, ඔබ ආනයන ප්‍රකාශනයක් ඉදිරිපත් කළ යුතුය. ආනයන ප්‍රකාශනය ඔබ ආනයනය කරන භාණ්ඩ පිළිබඳ තොරතුරු සපයයි. ආනයන ප්‍රකාශනයක් සිදු කිරීම සඳහා සැකසුම් ගාස්තුවක් අදාළ වේ. ඔබේ භාණ්ඩ සඳහා තීරුබදු සහ බදු ගෙවීමට ද ඔබට සිදු වනු ඇත.

ඔබේ භාණ්ඩ ආනයනය කිරීමට උපකාර ලබා ගැනීමට ඔබට බලපත්‍රලාභී රේගු තැරැව්කරුවෙකුගේ සේවාවන් භාවිතා කළ හැකිය. ආනයන කරන ලද භාණ්ඩ ඔබ සැපයුම්කරු වෙත ආපසු ලබා දෙන්නේ නම්, ඔබ ඒවා සඳහා ගෙවූ රේගු බදු ආපසු ගෙවීමට නීති මගින් ඉඩ නොදේ.

සමහර විට ඕස්ට්‍රේලියානු සමාගමකින් අන්තර්ජාලය හරහා මිලදී ගත් භාණ්ඩ විදේශයන්ගෙන් ඔබට සෘජුවම එවනු ලැබේ. මෙවිට ඔබට තීරුබදු සහ බදු ගෙවීමට සිදු විය හැකිය.

ඕස්ට්‍රේලියානු ආරක්ෂක සහ තාක්ෂණික ප්‍රමිතීන්ට (Australian safety and technical standards) අනුකූල නොවන ගෑස් සහ විදුලි භාණ්ඩ බරපතල ආරක්ෂක අවදානමක් ඇති කළ හැකිය. විදේශයන්හි online විකිණීමට ඇති මෙවැනි භාණ්ඩ ඕස්ට්‍රේලියාවේ ප්‍රමිතීන්ට අනුකූල නොවිය හැකිය. තවත් සමහර භාණ්ඩ ඕස්ට්‍රේලියානු ප්‍රමිතීන්ට අනුකූලව වෙනස් කිරීමට නොහැකි විය හැකිය.

ඔබ කොල්ලකෑ හෝ ව්‍යාජ අයිතම මිලදී ගන්නේ නම්, ඔබ දෝෂ සහිත නිෂ්පාදනයක් මිලදී ගන්නා අතරම බරපතල අපරාධ ක්‍රියාකාරකම් සහ හානිකර තත්ත්වයන් යටතට ඇතුළත් විය හැකි නීති විරෝධී වෙළඳාමකට ද සහාය වේ. මෙම භාණ්ඩ රට තුලට ගෙන ඒමෙන් වැළකීම තුළින් ප්‍රකාශන හිමිකම් කොල්ලකෑම සහ වෙළඳ සන්නාම ව්‍යාජ ලෙස භාවිත කිරීම මැඩපැවැත්වීමට ඔබටත් සහය විය හැකිය.

සමහර අවස්ථාවලදී, ඕස්ට්‍රේලියානු දේශසීමා බලකායේ (ABF) නිලධාරීන් ආනයනික ව්‍යාජ භාණ්ඩ අත්අඩංගුවට ගනු ලබයි. ව්‍යාජ භාණ්ඩ ආනයනය කිරීම සහ විකිණීම නීති විරෝධී වන අතර නඩු පැවරීමට හේතු විය හැක.